مبتجيش الجامعه ليه يابنتي !!!
- اصل الجامعه دي كلها فتنه كلها ذنوب الحياه اصلا كلها فتن وكل ما الواحد يقرب من ربنا كل ما اختباره بيزيد ويصعب ويجي يبهدله وممكن يتحرم من طاعات بسببه "
" دا كان سؤال لصاحبتي ودي كانت اجابتها ، للحظه ضحكت علي الجزء بتاع " الجامعه كلها ذنوب " بس لما قعدت لوحدي فكرت في الجمله بتاعت " الاختبار بيجي يبهدل "
-افتكرت الشاب اللي كان بيبكي للداعيه محمد الشيخ ويقوله انا كنت بحبها ولما هي قررت تعترفلي بحبها اعترفت ليا اول ليله ف رمضان قبل السحور ضيعت عليا الشهر ، افتكرت رد الشيخ وهو بيقوله الشياطين كانت محبوسه بس يابني قبل رمضان الشياطين اصلا بتعمل pdf لنقاط ضعفك وتعرف انت مشكلتك ايه ؟ ايه اللي ممكن يخليك تتجر للذنوب وتبدأ بقي تدرسها كويس وتحط الخطه اللي تبوظلك رمضان عشان في رمضان انت اللي تعصي وتبقي هي مجتش جمبك نهائي لانها محبوسه ... وبعد رمضان تجيلك وتقولك مفيش فايده منك انت مش هتتغير!
- حسيت ان فعلا اه الاختبار بيجي يبهدل بس لو نجحت فيه هتكسب سنين عمرك كلهم ، الاختبار مبيجيش علي طبق من دهب لا دا بيجيلك ف اضعف حالاتك بس المكافأه هي اللي بتيجي ع طبق من دهب جه في بالي الشاب اللي كان مدمن للمواقع الاباحيه ولما جه اختباره جه وهو لوحده ف البيت و الشيطان وسوس ليه قام قطع سلك الكمبيوتر وبوظ الكمبيوتر عشان ينجو من الاختبار بس ..بوظه عشان ينجح ف الاختبار
-افتكرت الشاب اللي كان بيقول للشيخ حازم شومان انا تعبان انا بكلم خمس بنات ومدمن للمواقع الاباحيه لما قررت افوق بعدت عنهم كلهم ما عدا بنت وبطلت المواقع خالص وبدأت اصوم بس كل ما بقول لصاحبي يلا نصلي يقولي ايه يابني ! انت شوفت اخر مقطع نزل يالهوي شوفت البت اللي فيه ياله ياشيخ دا فيه واحده ع النت عرضت عليا الزنا مقابل فلوس بس انا رفضت خوفا ع عرضي اختي وامي انا ياشيخ تعبان بجد اعمل ايييه ! افتكرت رد الشيخ حازم شومان وهو بيقوله انت دلوقت بتتشد من ناحيتين ناحيه الجنه وناحيه النار تقدر تدخل الجنه بسبب رفضك للزنا " ورجل راودته امرأه عن نفسها فقال اني اخاف الله " او ممكن تدخل النار بسبب جمله صاحبك لو كملت معاه ، بص يابني طول ما السمك بره الميه انسي انك تثبت
- حسيت ان فعلا الحياه بهدله لان صعب تلاقي اللي يشدك للصح شباب ببناطيل مقطعه وبنات ببناطيل قصيره وشعر باين وميكب لدرجه ان مبقاش المفروض البنت تغض بصرها عن الشباب لا دا بقي المفروض نغض بصرنا عن البنات كمان ، اختلاط في كل مكان سلام ب الايد وبيس فك كده يامان و الحياه زبادي في الخلاط ونرجع نقول تعبانين
- افتكرت جمله البنت اللي كلمت الشيخ محمد حسين يعقوب وهي بتبكي جامد اوي وبتقوله " انا انضحك عليا " وافتكرت رد الشيخ عليها وهو بيقولها لو كنتي بتحبيه كنتي هتخافي عليه ولو حبك هيخاف عليكي من النار وضمه القبر ، هيخاف عليكي من الفضيحه يوم القيامه ، دا لو حبك ،من اكتر الذنوب اللي بيهتز ليها عرش الرحمن هو الخلوة في شات بين ولد وبنت دا رسول الله قال ان من يفعل ذلك يؤذي الله ورسوله
- حسيت بجمله " طب ما نعمل شات للدفعه !" اللي بيبدأ ب بيس ابعتيلي المحاضره وبينتهي ب يابت انتي مراتي وحاجه في منتهي الروشنه بالنسبالهم !
طب عارفين انكم بتخلوا بنات تحتاج حد يحتويها بسبب افعالكم دي وبتروح لطريق غلط بسببكم ويلا كله في ميزانكم انتو افتكرت وقتها الشاب اللي بعت اغنيه لحبيبته ووصلت غلط لشيخ وقاله يعني فتحت ع نفسك فتنه حب حرام رايح تكمل في الطريق وتفتح باب تاني من الذنوب ! فعلا يابني والله هو باب انك ان تفتحه تلجه
- افتكرت الشاب اللي كان بيشرب سجاير ولما الشيخ محمد الغليظ قاله اشرب السجاير وانت باصص للسما قاله ياشيخ الحاجات دي مفيهاش هزار قاله يعني انت عارف اهو ان ربنا شايفك ، قاله اة ، قاله طب عارف ان كده بتتجرأ ع ربنا ! قاله لا دا مش تجرأ قاله لا دا تجرأ اللي بيعمل ذنب وعارف ان ربنا شايفه ويكمل فيه دا اسمه تجرأ
جه في بالي العربيات لما بتشغل اغاني كنت بحبها وبسمعها وتخيلت منظري في كل مرة وانا قاعده بحاول اكتم وداني بالعافيه وبتمني ان اكون طارشه ف اللحظه دي وببقي هموت ومسمعش عشان مرجعش للاغاني تاني وبقعد استغفر احاول الهي نفسي بحاول اعمل اي حاجه ببقي بستغيث اقسم بالله وهو ! هو قاعد عادي قاعد بيتجرأ وبيخلي 14 راكب معاه بياخدوا ذنوب
- افتكرت الشيخ حازم شومان وهو بيقول دا انا مرة اتحرمت من ان انا اخطب الجمعه فضلت اعاتب نفسي وادور ع الذنب اللي عملته اللي اتسبب ليا ف كده ... لان الطاعه ممكن تتحرم منها بسبب ذنب زي ماهي قالت
افتكرت وقتها الاوردر اللي كان المفروض اسلمه لفريق احلي شباب ايام امتحاناتي ولم التبرعات وكنت هتأخر ع امتحاني ومع ذلك اتبهدلت وروحت وجبت في الماده دي اعلي درجه رغم اني كنت بكرهها اوي ومكنتش عارفه ازاكرها ايه دا دي الطاعه فعلا بتساعد ! ايوة بيساعد ، وافتكرت الذنب اللي عملته وبسببه اتحرمت من عمل خيري كان ممكن ا
دخل الجنه بسببه
افتكرت الشاب اللي كان واقف بيغني لدكتور عشان ياخد منه درجات وفجأه لاقي نفسه بيقول في المايك " القلب ينشط للقبيح وكم ينام عن الحسن " وبيبكي وكانت الاغنيه سبب ف انه بقي داعيه دلوقت افتكرت الجمله بتاعت باب ربنا بيتفتح فجأه ليك بدون مقدمات بس اقسم بالله لو اتقفل هتبوس تراب الارض عشان يتفتحلك تاني ...
مش عارفه ليه حسيت انها صح ، انا اوقات ببقي ماشيه في الكليه عادي جدا بس مجرد ما بشوف بنت وولد قاعدين مع بعض وماسكين ايد بعض ببص للسما واقول يارب انت شايف وحاسس بيا بص اهو يارب وبعدها بضحك بس منكرش ان قلبي بيكون بيدق وقتها وافتكرت البنت اللي كانت مرتبطه واتوجعت من الحب لانه كان في السر ، انا أوقات بيعجبني لبس البناطيل وبعدها ببص للخمار واقول والله لو هيعملوا بناطيل بطير ما هقلعك دا انا كنت هموت عليك بس منكرش ان دا عاجبني ومنكرش وسوسه الشيطان ليا افتكرت وقتها البنت اللي كانت مختمره وبقت بتلبس بناطيل بسبب انها مقدرتش تسيطر ع وسوسه شيطانها ، افتكرت حالي النهارده وانا واقفه ف شباك الكليه ف الدور التالت وشايفه شباب وبنات تحت بيهزروا مع بعض وبعدها سرحت بخيالي لحظه كده ورجعت قولت لنفسي احنا هنخيب ولا ايييه فوقي معايا كده !
ايوة هي صح الحياه كلها ذنوب الحياه عموما كلها فتن وكل مره اختبارك بيجي صعب اوي بيجي ف وقت مينفعش يجيلك فيه اصلا لانك بتكون ضعيف اوي ، وكل مره اختبار بيتعب اوي بس كل الحكايه محتاجه ثبات بس الثبات دلوقت بقي صعب ف زي ما الشيخ حازم قال طول ما السكك بره الميه انسي انك تثبت ، هتتعبوا وهيطلع عينكم بس اقسم بالله مع اول خطوة ف الجنه هترتاحوا ، الحياه حرب طول ما سلاحك معاك هتعدي لكن لو ماشي فاضي هتتقتل قدام اول فتنه...💙"!
- اعتبروا البوست فضفضه بيني وبينكم كتبت كل حرف فيه من قلبي بجد والله احنا لو محتاجين حاجه فمحتاجين نهرب من كل مكان فيه فتنه ،
اسراء عاطف.
ملحوظه : هذا المقال من جروب Free Courses & Books
إرسال تعليق